"தென்னிந்தியாவிலிருந்து ஒரு பிரதமர் உருவாக்கப்பட வேண்டும்" - சட்டமன்றத்தில் அமைச்சர் ஆதவ் அர்ஜுனா அதிரடி உரை:

தமிழ்நாடு சட்டமன்றத்தில், மத்திய அரசு கொண்டு வர உத்தேசித்துள்ள தொகுதி மறுசீரமைப்பு மசோதாவுக்கு எதிராகக் கொண்டுவரப்பட்ட தனித் தீர்மானத்தின் மீது பொதுப்பணி மற்றும் விளையாட்டு மேம்பாட்டுத் துறை அமைச்சர் ஆதவ் அர்ஜுனா ஆற்றிய உரை அரசியல் களத்தில் பெரும் கவனத்தைப் பெற்றுள்ளது. தென்னிந்தியாவில் இருந்து ஒரு பிரதமர் உருவாக வேண்டும் என அவர் ஆணித்தரமாகப் பதிவு செய்துள்ளார்.

தீர்மானத்தின் பின்னணி :

முதலமைச்சர் ஜோசப் விஜய் தலைமையில் சமீபத்தில் நடைபெற்ற அனைத்துக் கட்சி நாடாளுமன்ற உறுப்பினர்கள் கூட்டத்தில் எடுக்கப்பட்ட முடிவின்படி, தொகுதி மறுசீரமைப்பு மசோதாவுக்கு எதிராகச் சட்டப்பேரவையில் இன்று தனித் தீர்மானம் கொண்டுவரப்பட்டது. இந்தத் தீர்மானத்தின் மீது பல்வேறு கட்சி உறுப்பினர்கள் மற்றும் அமைச்சர்கள் விவாதம் நடத்தினர்.

அமைச்சர் ஆதவ் அர்ஜுனாவின் உரையில் இடம்பெற்ற முக்கிய அம்சங்கள்:

சட்டப்பேரவையில் பேசிய அமைச்சர் ஆதவ் அர்ஜுனா, தொகுதி மறுவரையறையால் தென் மாநிலங்களுக்கு ஏற்படவுள்ள ஆபத்துகள் குறித்து விரிவாகப் பேசினார்.

வளர்ச்சியும் அரசியலும்:

 தமிழ்நாடு பல்வேறு துறைகளிலும் வளர்ச்சியடைந்த ஒரு முன்னோடி மாநிலமாக உள்ளது. ஆனால், அந்த வளர்ச்சி தேசிய அளவிலான அரசியலில் போதுமான அளவு பிரதிபலிக்கவில்லை.

பிரதமர் கோரிக்கை:

சட்டமன்றத்தில் நமது குரல் ஒலிப்பது போலப் பாராளுமன்றத்திலும் ஒலிக்க வேண்டும்; தென்னிந்தியாவில் இருந்து, குறிப்பாகத் தமிழ்நாட்டிலிருந்து ஒரு பிரதமர் உருவாக்கப்பட வேண்டும்.

வட மாநில ஆதிக்கம்:

தற்போது 5 முதல் 6  ஹிந்தி பேசும் வட மாநிலங்கள் ஒன்றிணைந்தாலே இந்தியாவின் பிரதமரைத் தேர்ந்தெடுக்கும் சூழல் உள்ளது. தென் மாநிலங்களுக்குத் தொகுதிகளை 50  சதவிகிதம் உயர்த்தினால் கூட, தொகுதி மறுவரையறையால் பாதிப்பே ஏற்படும்; இது வட இந்திய ஆதிக்கம் உருவாகும் சூழலையே ஏற்படுத்தும்.

உரிமை பறிபோகும் அபாயம்:

மாநில சுயாட்சிக்காக முன்னாள் முதல்வர்கள் கருணாநிதியும், ஜெயலலிதாவும் தொடர்ந்து குரல் கொடுத்துள்ளார்கள். நாடாளுமன்ற உறுப்பினர்களின் எண்ணிக்கை மாறுபடும் நேரத்தில், நமக்கான உரிமைகள் முற்றிலும் பறிபோகும் அபாயம் உள்ளது.

ஸ்டாலினுக்குப் பாராட்டு:

நீட்  விலக்குத் தீர்மானத்தை விட, தொகுதி மறுவரையறைக்கு எதிரான இந்தத் தீர்மானம் மிகவும் முக்கியமானது. இந்தத் தொகுதி மறுவரையறைக்கு எதிராக முதன்முதலாகக் குரல் கொடுத்த மு.க. ஸ்டாலினின் செயலை வரவேற்கிறோம்.

எதிர்க்கட்சிகளுக்கு அழைப்பு:

நாடாளுமன்றத்தில் மத்திய அரசு இந்த மசோதாவை வாக்கெடுப்புக்கு விடும்போது, அரசியல் ரீதியாக திமுகவும் காங்கிரஸ் கட்சியும் ஒன்றாக இருந்து இதனை எதிர்க்க வேண்டும். யாரும் வெளிநடப்பு செய்யாமல் அவையில் இருந்து மசோதாவுக்கு எதிராக வாக்களிக்க வேண்டும்.

மத்திய அரசுக்கான முக்கியக் கோரிக்கைகள்:

இந்த விவாதத்தின் முடிவில், மத்திய அரசை வலியுறுத்திப் பின்வரும் கோரிக்கைகள் முன்வைக்கப்பட்டன:மக்களவை உறுப்பினர்களின் எண்ணிக்கையை தற்போதுள்ள  543 ஆக நிரந்தரமாக்க வேண்டும்.

எதிர்வரும் மக்களவை மற்றும் சட்டப்பேரவைத் தேர்தல்களிலும் பெண்களுக்கு மூன்றில் ஒரு பங்கு (33%) இட ஒதுக்கீட்டை உறுதி செய்ய வேண்டும்.

தென் மாநிலங்களின் அரசியல் பிரதிநிதித்துவத்தைக் குறைக்கும் வகையில் அமைந்துள்ள தொகுதி மறுவரையறைக்கு எதிராக, அமைச்சர் ஆதவ் அர்ஜுனாவின் இந்த உரை தென்னிந்திய அரசியல் வட்டாரத்தில் முக்கியத்துவம் வாய்ந்ததாகப் பார்க்கப்படுகிறது